Прекрасното солено море има многу жители на кои можеме да налетаме, особено во плиткото. Посебна претпазливост и страв имаат родителите кои одат на одмор со своите деца.
Еден од жителите се морските ежови кои можат да ви го уништат одморот за миг кога ќе ги згазите. Тие обично се наоѓаат на карпи и камења во близина на брегот. Имаат кружен облик, а целото тело им е покриено со боцки. Проблемот настанува кога ќе ги газиме и убодот воопшто не е пријатен – болно е, кожата поцрвенува и може да дојде до оток. Најчесто луѓето се боцкаат по стапалата, но не се исклучени ниту нозете и дланките.
Ако не сте принудени, не треба сами да ги отстранувате боцките, бидејќи може да пукнат и да останат мали делови во ногата кои многу тешко се отстрануваат. Во 90% од случаите, иглите сами излегуваат од кожата по 2-3 дена, но подобро е да се отстранат што е можно поскоро за да се избегне воспалителна реакција на туѓото тело.
Специјалистот за дерматологија д-р Весна Ламер советува прво да се побара помош од лекар, доколку има таков во близина, кој стручно ќе ги отстрани боцките. Ако докторот не е наоколу, сепак ќе мора сами да ги извлечете. Од искуството на овој доктор најлесно е да се вадат иглите од ногата 2-3 дена по повредата. Меѓутоа, луѓето обично веднаш ги вадат бидејќи одењето е болно. Додека не се отстранат иглите, помагаат аналгетиците и ладните облоги.
Ако не помага, измешајте вода и топол оцет во леген, па потопете ги стапалата. Оцетот ќе ја омекне кожата, ќе ги отвори порите и ќе направи ситните боцки да излезат од кожата.
Како сами да ги отстраните боцките од морскиот еж:
При вадење на боцки мора да имате опрема за прва помош: стерилна пинцета, стерилна игла, антибиотска маст и алкохол, а повредената нога можете да ја измиете и со солена вода (не морска вода) или оцет. Иглите од морски еж се направени од калциум карбонат, а оцетната киселина ги разградува. Обидете се да го истуркате трнот со иглата, а потоа нежно извлечете го со пинцета.
