Добавувачот на „Apple“, „Foxconn“, најави дека апликациите за вештачка интелигенција значително ќе ја поддржат побарувачката за нејзиниот бизнис со сервери во оваа година. Сепак, компанијата ја задржа прогнозата дека 2023-та година ќе биде непроменета во финансиските резултати поради економските проблеми ширум светот.
За време на годишниот состанок на акционерите на „Foxconn“, претседателот на „Foxconn“, Лиу Јун-веи, рече дека компанијата останува внимателна оваа година во услови на заострување на монетарната политика, геополитички тензии и неизвесност за инфлацијата, но серверите се светла точка во услови на зголемен интерес за вештачката интелигенција.
„Се повеќе луѓе користат „ChatGPT“. Можете да видите дека пазарот на сервери за вештачка интелигенција ќе расте многу побрзо од очекуваното. Очекуваме дека во втората половина од годината би можело да има трицифрен пораст“, рече претседателот.
Тајванската компанија има 40% удел од глобалниот пазар на сервери и сака дополнително да го зголеми, додаде Лиу.
Во првиот квартал, сегментот на облак услуги и мрежни производи на „Foxconn“, кој вклучува сервери, придонесе со 22% од приходите, втор само по паметната потрошувачка електроника (каде што паѓаат паметните телефони) со 56%.
„Foxconn“ овој месец објави пад од 56% на нето добивката во првиот квартал, пропуштајќи ги предвидувањата, објавувајќи го најголемиот квартален пад во последните три години. Исто така, се вели дека „видливоста“ за тоа што да очекуваме за целата година е „ограничена“.
Компанијата, која е најголемиот светски снабдувач на електроника, сака да го повтори успехот што го постигна со „iPhone“ со електрични автомобили.
„Foxconn“, чие официјално име е „Hon Hai Precision Industry“, ја купи поранешната фабрика на „General Motors“ во Лордстаун, Охајо и го ангажираше поранешниот извршен директор на „Nissan“, Џун Секи, да ги води напорите за проширување на тој пазар, каде што се надева дека ќе стане голем производител.
Компанијата, исто така, размислува да го таргетира синџирот на снабдување со батерии за електрични возила надвор од Тајван, веројатно во САД, Индонезија и Индија, рече Лиу.
„Foxconn“, која склопува 70 отсто од светските „iPhone“ уреди, го диверзифицира производството надвор од Кина, каде строгите ограничувања за коронавирусот доведоа до проблеми во најголемата фабрика за „iPhone“. Компанијата исто така се обидува да избегне потенцијален удар за нејзиниот бизнис од зголемените трговски тензии меѓу Вашингтон и Пекинг.
Лиу коментираше дека Кина, вклучувајќи ја и огромната фабрика за „iPhone“ во Женгжу, останува многу важна за „Foxconn“.
