Седечкиот начин на живот е еден од најголемите проблеми денес. Вежбањето е превенција од многу проблеми и болести предизвикани од седењето.
Во зависност од вашата возраст, само неколку минути вежбање дневно може да има огромни придобивки.
Светската здравствена организација (СЗО) истакнува дека секој четврти возрасен не вежба доволно, додека четири од пет адолесценти не вежбаат доволно. Ако тоа се промени, пет милиони смртни случаи годишно би можеле да се избегнат ширум светот, пренесува Index.hr.
„Редовната физичка активност е клучна за спречување и помагање во управувањето со срцевите заболувања, дијабетес тип 2 и рак, како и за намалување на симптомите на депресија и анксиозност, намалување на когнитивното оштетување, подобрување на меморијата и подобрување на здравјето на мозокот“, велат од Светската здравствена организација.
Подолу ви ги претставуваме упатствата на Светската здравствена организација за тоа колку и каков вид на вежбање ни треба дневно во зависност од нашата возраст.
Деца под една година
За малите деца најважни се менталните вежби и активностите како што се зборувањето, оние кои го поттикнуваат когнитивниот развој и игрите на отворено. Тие треба да се изведуваат околу 30 минути на ден.
Деца од една до две години
СЗО препорачува минимум три часа дневно за физички вежби со секаков интензитет.
Деца од три до четири години
Најмалку 60 минути треба да се посветат на активности со висок интензитет, а останатите 120 минути на нешто порелаксирано.
Деца од пет до 17 години
Светската здравствена организација смета дека се неопходни околу 60 минути аеробни вежби со умерен или висок интензитет. На оваа возраст корисни се и вежбите за зајакнување на коските.
Возрасни од 18 до 64 години
СЗО препорачува 150 до 300 минути умерена аеробна физичка активност неделно за возрасни. Доколку е интензивно, од 75 до 150 минути. Што се однесува до вежбите кои вклучуваат употреба на сила, тие треба да се практикуваат најмалку два или три дена во неделата.
Постари од 65 години
Според Светската здравствена организација, во трето доба треба да ги следите упатствата за возрасните, но да ги приспособите на вашата физичка состојба. Велат и дека е неопходно да се фокусираме на подобрување на стабилноста и силата. Тие препорачуваат три или повеќе дена во неделата.
