Последниот бран на поскапувања и инфлацијата го погоди особено пазарот на автомобили, па некогаш релативно достапните семејни автомобили станаа луксузен производ.
Разликите сѐ уште поголеми кога се гледа во период од 30 години.
Според официјалните податоци на германскиот автомобилски клуб „ADAC“, автомобилите поскапеле и до 44 отсто во периодот од 2017-та до 2022-ра година, што значително се одразило на продажните резултати и на автомобилскиот пазар во целина.
Покрај пандемијата и прекините во испораките и недостигот на нови автомобили, причина секако е и инфлацијата, но една од главните причини се неоправданите поскапувања како и таргетираното отстранување на подостапните модели од понудата.
Затоа е особено интересно истражувањето на германскиот магазин „T-Online“ кој ги споредил денешните цени на автомобилите со оние од 90-тите години на минатиот век.
Се разбира, за споредба беше избран германскиот бестселер – „Volkswagen Golf“. Така, во 1991-ва година за третата генерација на „Golf“ во основната верзија и со најслабиот мотор во Германија требаше да се избројат 10.200 евра, кога цената се претвора од тогашната валута – германската марка.
Како што одминуваше времето, цената стануваше повисока, па така во 2012-та година основниот „Golf“ чинеше 17.000 евра, додека во 2020-та година цената достигна речиси 20.000 евра. Секако, голем скок на цената се случи во последните три години, па од почетокот на оваа година најприфатливиот „Volkswagen Golf“ во Германија чини дури 29.560 евра!
Секако, треба да се биде искрен и да се признае дека од техничка страна, „Golf 3“ и „Golf 8“ се слични само по име, и дека количината на опрема за удобност и безбедност, како и пасивната безбедност на модерниот компактен автомобил, е на многу повисоко ниво отколку кај автомобилите од пред 30 години.
