Од 1997 година, Мерцедес дел од својот профит дели со работниците. Годинава им исплати рекорден бонус.
Минатата година околу 100.000 работници на Мерцедес добија бонус од 6.000 евра, со што раководството ги награди работниците за профитабилната 2021 година. Следејќи ја оваа практика, покрај релативно успешна минатата година, Мерцедес одлучи годинава на работниците да им исплати рекорден бонус од дури 7.300 евра, што е повеќе од сегашниот максимален износ на исплата од 6.465 евра.
Оваа сума ќе ја добијат околу 93.000 работници. Висината и исплатата на бонусот ја договорија менаџментот и работничкиот совет, а ќе се исплати со платата за април. Почнувајќи од деловната 2023 година ќе се воспостави нов систем за пресметување на бонуси за делење добивка. Мерцедес вели дека новата стратегија ќе биде „усогласена со постоечкиот систем за управување“.
„Заедно, постигнавме многу во 2022 година. И покрај предизвикувачкото опкружување, нашиот тим на Mercedes-Benz направи уште еден голем чекор кон успешна трансформација на нашата компанија. Како признание за оваа изведба, се договоривме со главниот работнички совет да платиме посебен бонус од 7.300 евра оваа година. Овој број е значително над претходниот максимален износ. Со најголемиот бонус за споделување профит во историјата на компанијата, сакаме да ја изразиме нашата благодарност за исклучителната посветеност на нашите колеги“, рече Сабине Колајсен, член на Управниот одбор на Mercedes-Benz Group AG одговорна за човечки ресурси и директор за работни односи.
Рекордниот бонус доаѓа во време кога Мерцедес донесе одлука за рекордни инвестиции во електричната гама. До крајот на деценијата компанијата ќе инвестира над 43 милијарди евра. До 2030 година на повеќето пазари ќе нуди исклучиво електрични модели, а дотогаш планира да изгради осум фабрики за батерии. Од друга страна, инвестициите во развој на мотори со внатрешно согорување ќе се намалат за 80 отсто до 2026 година.
