Осигурителната индустрија е добро претставена на најновата листа на „Forbes Global 2000“, која рангира 2.000 од најголемите јавни компании во светот врз основа на проценка која ги зема предвид приходите, профитот, средствата и пазарната вредност на секоја фирма, пишува „Insurance Business Mag“.
Точно 105 осигурителни компании се присутни на листата за 2022-ра година. Единаесет од нив се во топ 100. Останатите топ 20 се рангирани до максимум 220 место меѓу сите компании.
Меѓу лидерите доминираат компаниите од САД, а потоа следат Кина, Швајцарија, Германија и Јапонија. По нив следуваат Франција, Холандија, Канада, Хонг Конг и Италија.
Осигурителните гиганти можат да се пофалат со комбинирана пазарна вредност од речиси 1,6 трилиони долари и средства во вкупна вредност од над 11,2 трилиони долари.
Во 2022-ра година, речиси сите осигурителни компании во првите 20 забележуваат пад на рангирањето. Најзабележително е кај најголемата осигурителна компанија во светот – кинеската „Ping An Insurance Group“, која падна за 11 позиции на 17-то место во споредба со минатата година.
Втора по големина осигурителна компанија е „UnitedHealth Group“, која загуби две позиции и сега е на 22-ро место. Следи минхенската компанија „Allianz“, која е на 35-то место.
Добро познатите индустриски играчи како „Aviva“, „Progressive“, „Legal & General“ и „Cathay Life“, во меѓувреме, отпаднаа од топ 200 на „Global 2000“ откако се рангираа меѓу најдобрите фирми во 2021-ва година.
Топ 10 најголеми осигурителни компании
„Ping An Insurance Group“ – Кина, пазарна вредност 121,69 милијарди долари.
„UnitedHealth Group“ – САД, 490,15 милијарди долари.
„Allianz“ – Германија, 96,42 милијарди долари.
„AXA Group“ – Франција, 65,75 милијарди долари.
„China Life“ – Кина, 43,02 милијарди долари.
„AIA Group“ – Хонг Конг, 120,19 милијарди долари.
„MetLife“ – САД, 57,39 милијарди долари
„Zurich Insurance“ – Швајцарија, 69,22 милијарди долари
„Cigna“ – САД, 81,21 милијарди долари.
„AIG“ – САД, 48,73 милијарди долари.
