Најголемата банка според средствата во САД, „JPMorgan“, би можела да загуби околу 1 милијарда долари поради руската инвазија на Украина. Ова го изјави шефот на финансиската институција Џејми Димон, цитиран од „Reuters“.
Во своето годишно писмо до акционерите, кое внимателно го следат пазарите, извршниот директор на банката ги повика САД да го зголемат своето воено присуство во Европа и го повтори својот повик за план за обезбедување енергетска безбедност за земјата и нејзините сојузници.
Димон не даде детали за потенцијалните загуби на банката или временската рамка, но рече дека „JPMorgan“ стравува од несаканите ефекти од руската инвазија врз компаниите и земјите.
Светските банки во последниве недели детално ги презентираа своите изложености кон Русија, но не и Димон, кој моментално е главен светски бизнис коментатор за последиците од конфликтот.
„Америка мора да се подготви за можноста за долготрајна војна во Украина со непознати последици. Мора да се подготвиме за најлошото и да се надеваме на најдоброто“, напиша во писмото шефот на финансиската институција.
Тој, исто така, се осврна на односите меѓу САД и Кина, велејќи дека Соединетите Држави треба да ги редизајнираат своите синџири на снабдување за да го ограничат опсегот на нивните добавувачи во земјата или да ги вклучат само „сите пријателски сојузници“. Димон ја повика најголемата светска економија да се приклучи на Транспацифичкото партнерство (TPP).
Што се однесува до макроекономското опкружување, банкарот рече дека бројот на зголемувања на каматните стапки на ФЕД „може да биде значително поголем отколку што очекува пазарот“.
