„Louis Vuitton“, водечкиот моден бренд на „LVMH“, ќе ги зголеми своите цени ширум светот во среда како резултат на зголемените трошоци за производство и транспорт, изјави за „Reuters“ портпаролката на француската групација за луксузни производи во Кина.
„Louis Vuitton“, најголемиот луксузен бренд во светот, ќе биде еден од првите брендови во индустријата што ќе ги зголеми цените во оваа година за да ги заштити своите маржи додека трошоците растат.
Зголемувањето на цените ќе влијае на продавниците на „Louis Vuitton“ ширум светот и ќе вклучи кожна облека, модни додатоци и парфеми, рече портпаролката во вторникот. Таа не даде дополнителни информации за големината на зголемувањата, но рече дека тие ќе зависат од производот
„Прилагодувањето на цената ги зема предвид промените во трошоците за производство, суровините, транспортот и инфлацијата“, се вели во изјавата на брендот.
Некои кинески блогери на социјалните мрежи велат дека цените на некои модели на чанти, како „Capucines“ и „Neverfull“, кои сега чинат 46.500 јуани (7.323 долари) и 12.000 јуани (1.890 долари), соодветно, ќе се зголемат за најмалку 20% во Кина, без исклучок.
„PurseBop“, сајт кој го следи пазарот на луксузни стоки, наведува шпекулации дека зголемувањето ќе биде помеѓу околу 4% во долната граница и 15-18% во просек во горната граница.
Претставувајќи рекордни продажби и профити за 2021-ва година пред одделот за мода и кожни производи, предводен од брендовите „Vuitton“ и „Dior“, шефот и милијардер на „LVMH“, Бернард Арно, во јануари рече дека групата има доволно слобода да ги зголеми цените во инфлаторно опкружување, но зголемувањата мора да бидете „разумни“.
За време на пандемијата, компаниите за луксузна стока ја искористија зголемената побарувачка за луксузна мода и додатоци за да ги подигнат нивните брендови на уште повисоко ниво. „Chanel“ минатата година три пати ги зголеми цените на некои од своите чанти. Популарниот модел „Classic Flap“, кој моментално чини 8.200 долари, е со 3.000 долари, или речиси 60%, над цената пред пандемијата во 2019-та година.
