Досега добивавме информации „на лажица“ за можен електричен автомобил на „Apple“, но сега се објавени малку поконкретни информации на таа тема. Ројтерс објави дека Apple планира да започне со производство на електрични возила во 2024 година.
iCar…?
Автомобилот треба да биде опремен со иновативна батерија со моноцелуларен дизајн. Ова, според извештајот, ќе и овозможи на компанијата да додаде поактивни материјали во батеријата, што исто така ќе обезбеди поголема километража со едно полнење. Apple исто така ја истражува можноста за употреба на батерии со литиум железо фосфат (LFP), кои помалку се загреваат и не содржат кобалт. Последново е можеби најважниот факт, бидејќи повеќе од 60 проценти од светските резерви на кобалт лежат во Демократска Република Конго, чии рудници често вработуваат деца, така што избегнувањето на овој елемент ќе ја намали употребата на деца во тешка физичка работа. Експертите велат дека употребата на батерии без кобалт претставува сосема ново ниво и може да се спореди со појавата на iPhone во светот на телефоните.
Возилото треба да биде опремено со LiDAR сензори преку кои би можело да ја „разбере“ околината во која се наоѓа. Тука, Apple може да ги користи и прилагоди постојните LiDAR сензори кои се користат во уредите со iPhone 12 Pro и iPad Pro.
Доцнење поради короната?
Како телефоните, и електричниот автомобил треба да го произведува надворешна компанија. Иако во моментов е закажано производство за 2024 година, можно е пандемијата на коронавирусот да биде причина да се одложи почетокот на производството барем до 2025 година, па дури и да се намали обемот на овој проект. Ова би значело дека наместо да произведува сопствен автомобил, Apple може да се определи за стратешко партнерство со некои од традиционалните производители чии модели ќе содржат напредни технологии на Apple. Засега е сигурно дека се работи на развој на некаков вид технологија за автомобили, само треба да видиме во каков облик ќе се појави на пазарот.
