Лидс јунајтед, со Џани Алиоски во составот, ги однесе бодовите од Гудисон парк. Со голот на Рафиња, во 79.минута, Лидс го победи Евертон 1:0. Ова беше прва победа на Лидс јунајтед на теренот на Евертон во 30 годишната историја на Премиер лигата.
Играчите на Лидс ја заслужија победата, бидејќи беа подобри во текот на целиот натпревар.
Во првото полувреме големи шанси за Лидс не реализираа Бамфорд, Херисон и Рафиња. Евертон во првото полувреме, најдобрата шанса ја имаше преку Дукуре. „Карамелите“ постигнаа два гола во првиот дел, преку Хамес Родригез и Ришарлисон кои беа поништени поради недозволени позиции во кои се наоѓаат играчите на Евертон.
Лидс јунајтед во вториот дел преку Бамфорд го погодија дирекот од голот на Пикфорд. Во 79.минута, Рафиња, со прецизен удар, низ нозете на Годфри, успеа да го совлада Пикфорд.
За Рафиња ова беше деби гол во Премиер лигата.
Македонскиот репрезентативец Алиоски го одигра целиот натпревар. Слично како и против Арсенал, одлично си ја заврши својата работа на теренот.
