Американската компанија за онлајн трговија на мало „Амазон“ ќе исплати еднократни празнични бонуси до 300 долари за вработените кои пакуваат и испорачуваат пратки, откако се соочи со синдикални критики за укинувањето на дополнителниот надоместок за работа во ризични околности, поради пандемијата на Ковид-19.
Компанијата соопшти дека на вработените со полно работно време ќе им исплати бонуси до 300 долари, а на хонорарците по 150 долари, доколку работат во тој гигант за е-трговија во текот на целиот декември, пренесува агенцијата „Блумберг“.
„Амазон“ во четвртокот соопшти дека со овој чекор ќе потроши повеќе од 500 милиони американски долари на еднократни бонуси за своите вработени во САД, кои работат во првите редови за време на сезоната на празници, а среде пандемијата од Ковид-19.
