Њујорк и САД се на самиот врв на листата на бизнис туристички дестинации според искуството и мислењето на деловните луѓе на раководните позиции во 94 земји во светот, а во однос на опсегот на цените и квалитетите на услугите кои ги опфаќаат состаноците, конференциите, саемите, изложбите…
Меѓу градовите, по Њујорк, на второто место е позициониран Лондон, додека пак третото место го зазема Сингапур, четвртото Париз, а петтото Чикаго. На листата на топ земји, по САД кој е на првото место, второто место го зазема Германија, третото го држи Италија, четвртото и припадна на Шпанија, а петтото на Франција.
Покрај импресивниот резултат кој го оствари САД освојувајќи го првото место во категоријата на земји и во категоријата на градови (Њујорк), лесно е видлива исклучителната позиција на европските градови и земји, како и силните импулси од Азија.
Имено, на листата „Best Buy Award Top 20 MICE“ светски градови, апсолутна доминација има Европа со дури 11 метрополи: Лондон на второто место, Барселона на деветото, Москва на дванаесетото, Женева на тринаесетото, Келн на четиринаесетото, Дизелдорф на седумнаесетото, Берлин на осумнаесетото, Виена на деветнаесетото и Милано на дваесетото место.
По европските градови, следат азиските метрополи, од кои пет успеаа да се пласираат на оваа листа: Сингапур на третото место, Хонг Конг на осмото, Шангај на единаесетото, Токио на петнаесетото и Пекинг на шеснаесетото место.
Северноамериканскиот континент е застапен со четири градови: Њујорк на првото место, Чикаго на петтото, Торонто на седмото и Лас Вегас на десетото место.
Глобалното истражување на „Best Buy Award- Global MICE Survey“ за 2012 година, кое го спроведе швајцарската компанија „ICERTIAS“ (International Certification Association) со седиште во Цирих, опфатило 21.895 деловни луѓе на раководни функции од 94 земји.
