Во 20 часот во Музеј на Град Скопје свечено ќе биде отворен фестивалот „Златна лира 2018“, со камерен концерт на Страшо Темков – флејта и Миле Каровски – гитара.
На концертот ќе бидат изведени камерни дела од авторите Ј. Иберт, Р. Д. Марино, А. Пјацола, Е. Боса, Б. Барток.
Фестивалот „Златна лира“ е основан пред 12 години како резултат на заложбите на македонските музички уметници за збогатување на концертниот живот во Скопје и зацврстување на традицијата на уметничката камерна музика во Македонија. Манифестацијата ги мобилизира и здружува креативните сили и релевантните фактори во културниот живот во промоција и афирмација на високите музички вредности.
Фестивалот има меѓународен карактер, а на неговиот подиум секоја година учествуваат врвни уметници од различни земји и се реализираат соработки и проекти со повеќе музички асоцијации од Европа и светот. Организатор на „Златна лира“ е Сојузот на музички уметници на Македонија – СМУМ.
