Концертот на „Камерно дуо“, составено од музичарите Арјана Куриу Груби (пијано) и Блерим Груби (виола), ќе се одржи во КИЦ на Република Македонија во Софија со почеток во 18:30 часот.
Арјана Куриу-Груби е родена во Тетово во 1971 год. Дипломирала на приштинската Музичка академија во 1994 година, во класата на проф. Лејла Пула-Хаѓиу. Во 2011 година во Скопје ги завршила постдипломските студии во класата на проф. Тодор Светиев. Од 1994 година е редовен професор на Факултетот на уметности, отсек Музика, во УШТ –Тетово, каде што го предава предметот Пијано.
Има бројни активности со своите ученици по пијано. На учествата на државните и интернационалните натпревари има добиено први, втори или трети награди.
Пијанистката Арјана Куриу-Груби има многубројни заеднички настапи со виолистот Блерим Груби во Република Македонија и во странство.
Блерим Груби е роден во Скопје, во 1965 година. Во родниот град ги добива своите први музички познавања, а во 1989 година, на скопскиот Факултет за музичка уметност при Универзитетот „Кирил и Методиј“ дипломира во класата на проф. Лубомир Господинов. На истиот факултет, под менторство на проф. Лубомир Господинов, ги завршува и постдипломските студии. Има студиски престој во Италија во годините 1994 и 1995, во Академијата Chigana во Сиена.По завршените студии почнува со работа во Македонска филхармонија.
Блерим Груби едновремено ја развива својата солистичка дејност и учествува во камерни состави. Има многубројни настапи на фестивали во блиските балкански земји, но и во Италија, Германија, Австрија, Шпанија, Португалија, Норвешка, Јапонија и САД
Актуално е професор на Државниот универзитет во Тетово и на Универзитетот во Приштина, солист е на Косовската филхармонија, гудачкото трио „Косова“, ансамбл „Бахус-Скопје“.
Концертот е дел годишната програма на КИЦ на Република Македонија во Софија и е поддржан од Министерството за култура.
