Летен филм на брод на Охридското Езеро – уникатно звучи новитетот што ќе се случи на вториот ден на „Бич филм-фестивал“. Денеска сите заинтересирани ќе можат да го гледаат данскиот филм „Holiday“ на бродот “Галеб”, кој во 22 часот ќе тргне од Охрид и ќе плови кон плажата Оревче.
Критичарите го опишуваат „Holiday“ како моќен филм што не е препорачлив за претпазливите и оние со слабо срце. Прикажува една од највознемирувачките сцени на силување во западната кинематографија раскажувајќи ја приказната за една млада девојка вплеткана во канџите на дански гангстер за време на одмор на турската ривиера, поточно во Бодрум. Ова е уште еден висококвалитетен филм на жена режисер со женски главен лик во него. Филм кој дефинитивно ќе ви остави голем впечаток и кој ќе покрене бројни дискусии околу игрите на моќта меѓу мажите и жените.
Во меѓувреме на плажата Оревче ќе играат два филма од официјалната селекција, турскиот „Wish to wash with rain“ од 21 часот и македонскиот „Digging“ од 22.30 часот. „Digging“ е игран филм снимен во независна продукција на MI Film. Филмот е своевиден експеримент – снимен со речиси никаков буџет. Работен е по истоимениот текст на Кристијан Винклер, кој беше поставен во Македонскиот Народен Театар во април 2017 година. Благодарение на сите филмски професионалци вклучени во овој проект, филмот е снимен во само 6 дена минатиот јули. Режисери на филмот се Ивица Димитријевиќ и Мартин Иванов, а во него играат Гораст Цветковски, Ивица Димитријевиќ и Александар Ѓоргиески.
Филмот ја раскажува приказната за двајца пријатели кои се среќаваат во едно село по цели 16 години, придружувани од уште едно лице каде почнуваат да копаат бунар. Тие разговараат, но во исто време и молчат за нивното заедничко минато, за нивното пријателство и нивното одвојување. Тоа е копање низ минатото и сегашноста, филм за пријателството и посебните закони што владеат во него.
По двете филмски проекции, следува музичкиот дел што почнува со бендот „Palindrom“ точно на полноќ и DJ Klara во 01 часот.
