Од фабриката во Сандерленд на секои 105 секунди излегува по еден примерок на моделот „Juke“.
„Nissan“ беше меѓу првите производители на автомобили кои направија чекор во сегментот на поткомпактни „SUV“/кросовер возила, класа која во последниве десетина години доживеа огромен раст во популарноста ширум светот, а особено во Европа.
На Стариот континент во 2017-та се испорачани 95.000 примероци од малиот „SUV“ на „Nissan“.
Првиот „Juke“ е произведен во британската фабрика на „Nissan“ во 2010-та година, а на јапонската компанија и беа потребни само осум години во овој погон да направи милион возила.
Јубилејниот автомобил е со сина боја и е опремен со пакетот „Tekna“.
Интересно е дека „Juke“ е веќе долго време на пазарот без значителни стилски промени, но со технолошки подобрувања, па и скоро по една деценија е многу популарен меѓу купувачите на овој вид возила. Освен во Велика Британија, моделот се составува и во Јапонија и Индонезија.
„Nissan“ во Сандерленд произведува уште еден „SUV“/кросовер, кој е дури повеќе баран и од моделот „Juke“. Станува збор за малку поголемиот „Qashqai“ чија прва генерација беше лансирана во 2006-та, додека актуелната верзија се изработува од 2013-та.