Првиот сериски модел на „Lamborghini“ со хибриден погон бил прикажан на одбрани клиенти на специјален настан во Италија. На него биле присутни 200 „пријатели“ на компанијата, кои биле обврзани да не откриваат информации за возилото.
Изданието „Thesupercarblog“ сепак дојде до детали за машината која засега го носи кодот „Lamborghini LB48H“. Неговото производство ќе започне кон крајот на годината, а Италијанците ќе прават точно 63 примероци. Секој од нив ќе чини 2,5 милиони евра.
За изгледот на хиперавтомобилот се користат дел од решенијата од концептниот модел „Lamborghini Terzo Millennio“ (на сликите), прикажан во ноември минатата година. Сличностите сепак не завршуваат тука, бидејќи концепт прототип претставуваше електромобил со еден мотор на секое тркало, додека „Lamborghini LB48H“ е првиот хибрид во историјата на брендот, кој за погон користи „V12“ бензинец и елекромотори.
Погонски агрегат на новиот хиперавтомобил ќе биде искористен и за наследникот на „Lamborghini Aventador“, кој ќе излезе во 2020-та година. Од компанијата планираат да го покажат „LB48H“ на уште 2 вакви настани – во Њујорк и Токио, каде најверојатно ќе бидат поканети и претставници на медиумите.
