Здружението „Љубители на класичната музика” Скопје по десетти пат организира концерт по повод интернационалниот празник и роденден на инструментот хармоника.
Светската Унија на хармоникашите одлучи 6 мај да го прогласи за светски ден на хармониката во 2009 година. Причината токму овој ден да биде прогласен за ден на хармониката е датумот на кој во 1829 година за прв пат е патентиран инструментот.
Свечениот јубилеен концерт по повод Светскиот ден на хармониката ќе се одржи в недела, 6 мај, со почеток во 20 часот на големата сцена во Македонскиот народен театар во Скопје. Влезот е слободен.
На концертот ќе настапат реномирани уметници од земјата како и ученици и студенти од класата на Проф. Зорица Каракутовска. На програмата ќе бидат изведени дела од: Зубицки, Дербенко, Бете Илин, Анџелис, Пјацола и други.
Концертот е поддржан преку националната годишна програма за култура на Министерството за култура. Меѓународниот проект „6-ти мај Светски ден на хармониката” македонското здружение на хармоникашите го поддржува со успешна реализација на концерти во земјата и странство.