„30 години читаме со задоволство“ е слоганот на јубилејниот 30. по ред Саем на книгата, кој започнува утре, а ќе трае до 9 мај, во ВИП-арената „Борис Трајковски“.
За подобар пристап до Саемот, по барање на „Скопски саем“, ЈСП воведе две нови автобуски линии од разни краеви на Скопје, со број 100/1 и 200/1, кои ќе водат до арената, а влезот за сите групни и организирани посети на ученици ќе биде бесплатен. Работното време на Саемот е од 10 до 20 часот. Цената на редовната влезница изнесува 30 денари.
Саемот го организира „Скопски саем“, под покровителство на Министерството за културa. Организаторите соопштуваат дека најавено е учество на 70-ина издавачки куќи од Македонија и од регионот.
Покрај изложбено-продажниот дел, предвиден е посебен простор за т.н. промотивен центар, каде што ќе се одвиваат настаните. Дел од програмата на промотивниот центар е и доделувањето на наградите во организација на Македонската асоцијација на издавачи (МАИ), што е закажано за сабота, 5 мај, во 18 часот, како и доделувањето награди организирано од Здружението на издавачите и книжарите на Македонија (ЗИКМ), што ќе биде во вторник, 8 мај, во 19 часот.
Сите што ќе го посетат Саемот на книгата ќе може да ги проследат промоциите што ги организираат издавачките куќи на своите штандови, да ги видат сите нови наслови, но и да си набават книги со големи саемски попусти до 70 отсто.
