Шестото издание на фестивалот за феминистичка култура и акција „Прво па женско“ ќе се одржи од утре до недела (3-6 мај) во Младинскиот културен центар и во Кино Култура. Четиридневната програма опфаќа дискусии, изложби, перформанси, поетски слем, театарска претстава, филмска проекција, концерти и диџеј сетови, работилница за деца, промоција на книга.
Фестивалот ќе започне утре во 12 часот пред платото на Младинскиот културен центар со дискурзивна програма, каде ќе се дискутира за женската солидарност и социјалното претприемништво, работничките права на сексуалните работнички и на текстилните работнички. Учество во дискусијата ќе земат Мила Царовска, министерка за труд и социјална политика, Јасминка Ангелова од Министерството за внатрешни работи, Кристина Ампева (Гласен текстилец), Драгана Каровска Чемерска (ХЕРА), Јелена Вишњиќ (БеФем – Белград) и Наташа Бошкова (Коалиција Маргини).
Официјалното отворање на Фестивалот е закажано за истата вечер од 21 часот во Младинскиот културен центар, со отворање на изложбите „Ćemo, ćemo … ja, ma kako ćemo?!“ на Божена Кончиќ Бадурина и Дуга Мавринац од Храватска и Куварици на NEpraktične žeNE од Србија, по што ќе следи поетскиот слем на ЛезФем.
Целосната програма на фестивалот е објавена ТУКА!
Фестивалот е поддржан од Министерството за култура, Градот Скопје, FRIDA Young Feminist Fund и се реализира во соработка со Младинскиот културен центар, Пасворд Продукција, Млад отворен театар, Кино Култура, Локомотива, ISKRA Tourbooking и ЛезФем.
