Со почеток во 21 часот, вечерва, во ресторанот МКЦ, во организација на „3 гонга“ ќе настапи Јаси Хофер, 25-годишната виртуозна гитаристка од Германија, која ќе го промовира својот нов албум Faith. Настапот во Скопје е дел од нејзината голема европска турнеја.
Нејзин прв инструмент била виолината, но на 12 години одлучува дека електричната гитара е инструментот што таа сака да го освои. Само неколку месеци откако почнала да зема часови по гитара, нејзиниот професор ја запознава со легендарниот гитарист Steve Vai. Сосема нов свет се отвора за Хофер. Инспирирана од својот нов и единствен идол, таа почнува да ги свири вежбајќи ги неговите песни и по 10 часа на ден. Нејзините музички обиди таа јавно ги објавува на „Јутјуб“ и тоа ѝ донесува милиони кликови и импресии и секако вниманието на самиот Steve Vai. Во 2007 година Steve јa поканува Јаси да настапи со него на сцена во нејзиниот роден град Улм да ја отсвират заедно неговата песна Answers. Таа доживува голем успех со ова појавување и веднаш потоа добива покана од дискографска куќа да го сними нејзиниот прв ЕП.
Таа го напушта училиштето и добива шанса да студира музика во Штутгард. По само 3 семестри, добива стипенија за го продолжи своето школување на прочуениот Беркли колеџ за музика во Бостон. По нејзината наобразба, се враќа во Германија и го издава својот дебитантски албум со наслов „Јаси“ во 2014 година. Денес таа патува низ светот и ја промовира својата музика со својот бенд делејќи ја сцената со музички артисти како UFO, Chris Thompson, Steve Vai, Savoy Brown, Hellmut Hattler, Gil Ofarim and Neil Young. Во 2016 година таа го финишира својот нов албум Faith и во моментот е на европска турнеја.
