„Бикини Мун“ на Манчевски ќе се прикажува и во Битола

Најновиот филм на режисерот Милчо Манчевски, „Бикини Мун“, од утре (4 април) ќе почне да се прикажува во 3Д Кино Битола. Инаку, овој филм ќе доживее проекции и во другите градови низ републиката.

„Бикини Мун“ е американски филм на Манчевски, сниман на локации во Њујорк. Приказната е психолошки портрет на Бикини Мун Дејвис – говори за искршениот идеал на модерното семејство, но и за изгубената приватност во светот окупиран од камери, мобилни телефони и сеприсутните социјални мрежи. Филмската структура на „Бикини Мун“ е филм во филм, во кој филмската стварност е двојно манипулирана.

Главна хероина е повратничката од војната во Ирак и е харизматична, енергична, духовита, убава и провокативна, но и ментално нестабилна. Нејзината приказна и нејзиното однесување водат до работ на вистината, и често гледачите не се сигурни што е вистина, а што фантазија.

Главните улоги ги играат Кондола Рашад, Сара Голдберг, Вил Џеновиц, Сатја Сридхаран и Микал Мишел Харис. Дизајнер на продукција е редовниот соработник на Манчевски, Британецот Дејвид Манс, кој има работено на сите негови досегашни филмски проекти. Директор на фотографија е Џошуа З. Вајнстин. Единствен Македонец во филмската екипа, покрај режисерот, е композиторот на музиката – Игор Василев Новоградска.

Филмот ја имаше македонската премиера во Скопје пред десетина дена и наиде на исклучително позитивен прием. Истиот и понатаму е на репертоарот на кино „Милениум“ во Скопје.