Во Музејот на град Скопје вчера се отвори изложбата на дела од 9 млади уметници, насловена „Портали“.
Изложбата е организирана во рамки на проектот „Креарт“ – Мрежа на градови за уметничко творештво (CreArt – Network of Cities for Artistic Creation), а истата е дел од активностите за одбележување на 21 Март – Европскиот ден на уметничка креативност.
Изложбата „Портали“ ја отвори претседателката на Советот на Град Скопје, Љубица Јанчева.
Таа истакна дека осознавањето на новите културни вредности и императиви, како и нивната реализација е стимулирана преку воспоствувањето нови меѓународни партнерства и размени и учество на уметниците и кураторите од градот Скопје во програмските активности, што се оддржуваат во градовите партнери во проектот.
„Задоволство ми е што Град Скопје е партнер во проектот, а уште поголемо е задоволството што овој и ваков проект ќе поттикне на понатамошно восприемање на уметноста како олицетворение на духовната и креативната убавина на авторите на уметничките дела“, резимираше Јанчева.
Во проектот „Креарт“ (CreArt) учествуваат 12 градови од 9 земји, и во него освен Скопје се вклучени и Ваљадолид од Шпанија, Џенова од Италија, Ливерпул од Велика Британија, Клермон-Феран и Руан од Франција, Загреб од Хрватска, Каунасод Литванија, Лублин и Катовице од Полска и Авеиро од Португалија.
Инаку, град Скопје од 2017 година е партнер во „Креарт“.
