Светската атракција „Fire of Anatolia“ со нивното спектакуларно шоу кое никого не остава рамнодушен, на 12-ти март годинава доаѓа во Скопје, во Вип Арената Борис Трајковски.
„Основен концепт на проектот „Fire of Anatolia“ е спојот на цивилизациите. Тоа е танцов портрет кој дава универзални пораки за мир. Претставува светско шоу, културен празник со современи стандарди, комбинирање на фолклорни игри со балет, со современи танци и други дисциплини на танц“, информираат од „Pragma Production“.
„Fire of Anatolia“ со потекло од митолошката и културната историја на Анадолија, е уникатен проект кој содржи 3.000 танцови фигури и народна музика, кои се составени од речиси секој регион на Анадолија. Проектот кој е креиран од Мустафа Ердоган има за цел да го претстави огнот на Анадолија низ целиот свет, кој се заснова на идејата за комбинирање на концептот на мирот со културниот и историски мозаик на Анадолија илјада години наназад.
Колективот „Fire of Anatolia“ досега имал настапи на најпрестижни места низ светот, како што се Медисон Сквер Гарден, Њујорк и Чикаго театар, Палатата на Конгресот, плоштадот Берси и Трокадеро – пред Ајфеловата кула, три пати во Големата сала на Парламентот во Кина, двапати во Кремљската палата, пред пирамидите во Гиза и Цитаделата Саладин во Египет и на уште многу други атрактивни локации.
Како што соопштува организаторот на настанот, билетите за овој спектакл се пуштени во продажба и истите може да се набават на сите продажни места на „КупиКартиЗаСе“, „Пола Југотон“, Цвеќара „Розе“ – Веро 2, како и онлајн на www.kupikartizase.com.