Краткометражниот филм „Види ја ти неа“, во режија на Горан Столевски, влезе во официјалната програма на најпрестижниот фестивал посветен на краткиот филм кој се одржува во Клермон – Феран во Франција.
Претходно, филмот влезе во селекција во интернационалната компетиција на Филмскиот фестивал „Санденс“.
„Види ја ти неа“ ќе има осум проекции во рамките на 40. Клермон – Феран ИФКФ, кој ќе се одржи во периодот од 2 до 10 февруари 2018 година. Термините за прикажување ќе бидат официјално објавени на веб-страницата на Фестивалот на почетокот на јануари в година.
„Види ја ти неа“ е приказна за младата девојка Анета, која се обидува да ги реши проблемите во семејството и училиштето вклучувајќи се во еден исклучиво машки верски ритуал, скокање по крстот за Водици.
Горан Столевски е млад режисер роден во Македонија. Дипломирал на универзитетот во Мелбурн, а завршил филмска и телевизиска режија на Викторијанскиот колеџ за уметности во Мелбурн. Живее и работи на релација Австралија-Велика Британија.
Улогите во филмот ги толкуваат Сара Климоска, Пируника Киселички, Жарко Јовановиќ, Антонија Белазелкоска, Иво Антов, Виктор Арсов, Игор Ангелов, Симон Манасковски, Изабела Новотни, Милица Стојанова и Горан Илиќ.
Филмот е на „Црна мачка продукција“, копродукција со „Скопје филм студио, а финансиски подржан од Агенцијата за филм на РМ.
