Во првата половина на календарската 2018 година „Матица македонска“ од Скопје ќе објави Избрани дела во десет книги од познатиот политичар, колумнист, публицист и писател Стојан Андов, прв претседател на Собранието на Република Македонија.
Во колекцијата се застапени делата: „На мој начин“, „Источни патувања“, „Стравот и љубовта“, „Кицо Американецот“, „Враќањето на Американецот“, „Јосип Броз Тито и распаѓањето на Југославија“, „Приказната за Марија“, „Драматичната 1991 година“, „1992 година на опасни ризици“ и „Успеси и заговори 1993 година“.
Стојан Андов (Кавадарци, 1935 година) е автор на мемоарски, публицистички и литературни дела, кои предизвикаа љубопитство кај критички настроените проследувачи на нашите историски, политички, општествени и литературни збиднувања. Неговиот начин на соопштување и коментирање на темите, настаните и личностите е отворен и концизен, длабоко осмислен, со уверливи и силни пораки.
