Експертите од компанијата за истражување на автомобилскиот пазар „JATO Dynamics“ ги соопштија резултатите од продажбата на нови автомобили во Европа за месец јуни.
Во споредба со мај од Топ 10 отпаднал „VW Tiguan“, кој беше на десетта позиција. Промена има и кај второто и третото место каде моделите си ги размениле местата во споредба со рангирањето од пред еден месец.
Лидер традиционално останува „Volkswagen Golf“ (на сликата), од кој се продадени 44.684 едници. Падот кај германскиот модел е 2,9%. Зад него се подредува „Renault Clio“ со 36.134 возила, а и тука има намалување од 1,5%.
Третата позиција е за „Volkswagen Polo“, чија нова генерација веќе е на пазарот. Малиот германски хечбек оствари резултат од 32.021 продадени автомобили, а зголемувањето кај него е со 5,7%.
Следат „Opel/Vauxhall Corsa“, избран од 24.383 европски клиенти (-9,1%) и „Renault Captur“ – 23.963 единици (-5,5%). Во првите десет влегуваат уште „Peugeot 208“ (22 974, -4,2%), „Ford Fiesta“ (22.445, -22,9%), „Ford Focus“ (22.377, + 3,8%), „Skoda Octavia“ (22.376, + 2,8%), и „Nissan Qashqai“ (22.339, -0,4%).
