Книгата „Пејач во кулата” објавена во Москва

Поетот­ академик Влада Урошевиќ ја објави својата книга „Пејач во кулата” во Москва, во издание на „Рудомино”.

Изборот од сето досегашно поетско творештво на нашиот поет е во препев на реномираната преведувачка Олга Панкина, која досега со успех превела веќе неколку десетини книги на македонски писатели на руски јазик.

Изданието е збогатено со колажи на Влада Урошевиќ, претставени пред јавноста на неговата изложба во Ликовната галерија на МАНУ пред неколку години. Изборот е проследен со автобиографска белешка на самиот Урошевиќ, во која авторот изнесува некои интересни податоци за својот животен и творечки пат, како и со поговор од Андреј Базилевски под наслов „Сонувања во забранетата зона”.

Објавувањето на книгата во мошне репрезентативна опрема е помогнато од Министерството за култура на Република Македонија и од Фондацијата „Трифун Костовски” при Македонската академија на науките и уметностите.