Целосно новата генерација на „Citroen C3“ која француската марка ќе ја претстави официјално на крајот на месецот за време на автосаемот во Париз, веќе е достапна на домашниот пазар. Во Франција компактниот хечбек има почетна цена од 12.500 евра.
Дизајнот на новиот „C3“ црпи инспирација од екстравагантниот модел „C4 Cactus“, а според Французите „инјектира здив на свеж воздух во сегментот“.
Моделот се нуди во три нивоа на опрема – „Live“, „Feel“ и „Shine“, покажувајќи завидни можности за персонализација. Достапни се 9 бои на каросеријата, 3 за покривот, како и 36 комбинации на бои независно од нивото на опрема.
Уникатните заштитни елементи од двете страни на каросеријата се сериски за нивоата „Feel“ и „Shine“, а листата на опрема вклучува панорамски стаклен покрив, 7-инчен централен дисплеј, паркинг асистент, препознавање на сообраќајните знаци и многу други.
Погонот на моделот е доверен на широкиот спектар на економични мотори. Бензинските се со три цилиндри од серијата „PureTech“, а генерираат 68, 82 или 110 КС. Дизел „BlueHDi“ нуди 75 или 100 КС.
Во моментов моделот е достапен само на одредени европски пазари, а цените во Франција почнуваат од 12.500 евра. Испораките кон клиенти ќе стартуваат веднаш по саемот во Париз.
