Јапонскиот производител на автомобили Nissan купува 34 отсто од акциите од другата јапонска компанија Mitsubishi motors за 1,9 милијарди евра.
Во објавата пренесена до Агенцијата за финансиски услуги, Mitsubishi motors ќе издаде 506,6 милиони акции на Nissan по цена од 468,52 јена по акција, што е вкупно 237,36 милијарди јени (1,9 милијарди евра или 2,2 милијарди долари).
Директорот на Нисан Карлос Гон во четврток одржа вонредна конференција за печат заедно со претседателот на Mitsubishi motors, Осама Масука во Јокохама, каде што е седиштето на Nissan.
Гон рече дека Nissan ќе инвестира 237 милијарди јени (2,2 милијарди долари) во Mitsubishi motors и со тоа ќе стане најголем инвеститор во оваа компанија.
Масуко рече дека компаниите од Mitsubishi групата и натаму ќе имаат удел во Mitsubishi.
Компанијата Mitsubishi motors е под истрага заради лажирање на тестовите за потрошувачка на гориво за одделни модели на автомобили.
Јапонските медиуми јавија дека со лажирање на податоците за потрошувачката на гориво се погодени десетици модели на возила продадени во Јапонија во последните 25 години.
Договорот меѓу Nissan и Mitsubishi за купопродажбата треба да биде потпишан до 25 мај, а да се спроведе во октомври.
Со тоа, Nissan ќе стане најголем акционер во Mitsubishi motors corporation, пред групата Mitsubishi Heavy Industries која има 20 отсто од уделот.
Nissan и Mitsubishi се веќе партнери, Nissan произведува возила за Mitsubishi motors corporation, кој прави минивозила за Nissan.
