„Volvo“ ги претстави обновените „надуени“ верзии на моделите „S60“ и „V60“, доработени со помош на „Polestar“. Според претставник на скандинавскиот производител тоа се најмоќните и најбрзите сериски верзии во историјата на двата модела.
Седанот и караванот добиле нов 2,0-литарски бензински турбо мотор од семејството „Drive-E“, кој го заменува досегашниот 3.0-литарски мотор со 6 цилиндри. Моќноста на агрегатот е 367 КС и 470 Нм вртежен момент, што е за 17 КС и 30 Нм повеќе од претходната варијанта на моделот.
Новиот мотор е опремен со поголема турбина со дополнителен компресор, а исто така и со нова оска со брегови и променет систем за вбризгување на горивото. Обновените „S60“ и „V60“ добиле исто така систем за погон на четири тркала, дело на компанијата „Borg Warner“, како и 8-брзински автоматски менувач.
Благодарение на поставувањето на новите агрегати, тежината на седанот и караванот е намалена за 20 кг. односно до 1751 и 1796 кг. Така двете машини ќе можат да забрзуваат од 0 до 100 км/ч за 4,7 секунди, што е за 0,2 секунди побрзо од претходната верзија на моделот. Максималната брзина е ограничена на 250 км/ч.
Автомобилите исто така добиле надоградби на механизмите за сопирање, преработен систем за управување, а исто така и нови 20-инчни тркала од лесна легура.
Од „Polestar“ тврдат дека уште оваа година земјите во кои ќе се нудат доработените модели на „Volvo“ од нивна страна, ќе се зголемат од 13 на 47. Швеѓаните планираат да ја зголемат продажбата на такви возила од 750 на 1.500 годишно.