Новата генерација на роудстерот „Mazda MX-5“ беше избрана за „Светски автомобил на годината“. Резултатите од гласањето во кое учествуваа 73 автомобилски новинари од 23 земји, беа објавени во рамките на автосаемот во Њујорк.
Во финалето „Mazda MX-5“ успеа да се избори со новата генерација на семејството „Audi A4“ и со „Mercedes-Benz GLC“. Покрај тоа роудстерот на Јапонците ја освои и наградата за „Најдобар дизајн“, каде ги претекна „Cadillac CT6“, „Mazda CX-3“, „Jaguar XE“ и „Land Rover Disvovery Sport“.
За „Најдобар луксузен автомобил“ беше избрана новиот „BMW Series 7“. Баварскиот седан ги имаше за ривали „Audi Q7“, „Jaguar XF“, „Mercedes-Benz GLE Coupe“ и „Volvo XC90“.
„Спортски автомобил на годината“ е новото „Audi R8“ што се избори за првото место во престижната листа во конкуренција на „Chevrolet Camaro“, „Honda Civic Type R“, „Mercedes-AMG C63 Coupe“ и „Range Rover Sport SVR“.
Кај „Зелените автомобили“ наградата ја грабна водородиот седан „Toyota Mirai“. Покрај него до конечното гласање стигнаа „BMW 330e“, „Chevrolet Volt“, „Toyota Prius“ и „Volkswagen Passat GTE“.
Во 2015-та година „Светски автомобил на годината“ стана „Mercedes-Benz C-Class“, а кај спортските автомобили првото место беше за „Mercedes-AMG GT“. За „Најдобар луксузен модел“ беше избран „Mercedes-Benz S-Class“, додека наградата за дизајн беше врачена на „Citroen C4 Cactus“. Првото место кај „зелените“ машини беше за „BMW i8“.
