Шпанија ќе игра против Германија во финалето на Европското ракометно првенство во Полска, откако во второто полуфинале ја совлада Хрватска 33:29 (18:14).
Шпанците четврти пат ќе играат финале на едно ЕП, а в недела во Краков, ќе се обидат да го освојат своето прво злато на континеталните шампионати.
„Црвената фурија“ успеа да ја сопре разиграната Хрватска, која подобро влезе во мечот и до 21-ва минута без поголеми проблеми имаше предност од еден до три гола.
Играта на Хрватска се распадна во моментот кога Шпанците најдоа решение за зоната 5-1. Од 21 минута до крајот на полувремето Шпанците негативата од три гола (10:13), ја претворија во позитива од четири гола (18:14).
Во второто полувреме, Шпанците ја одржуваа разликата, најчесто од три гола, Хрватите се доближија во 48-ма минута на гола негатива, но немаа сили за целосен пресврт, а надежите дека можат да стигнат до финалето им ги уништи Томас, кој за 30 секунди два пати реалзиираше од контранапад и ја врати разликата на четити гола.
Антонио Гарсија и Ривера постигнаа по шест гола, а Томас и Агинагалде по пет за шпанската репрезентација, додека кај Хрватска најефикасен беше Слишковиќ со шест гола, а по четири постигнаа Копљар, Штрлек и Мариќ.
Финалниот меч Шпанија-Германија ќе се одигра в недела од 17:30 часот, а претходно од 15 часот Норвешка и Хрватска ќе се борат за бронзениот медал.
Инаку, Шпанија и Германија играа на отворањето на првенството, во првото коло во Б групата, Шпанците славеа со 32:29.
