Корејскиот производител ќе претстави во јануари нов модел од средна класа – „IONIQ“, кој ќе биде достапен со три опции на погонски системи. Купувачите ќе можат да изберат меѓу чисто електрична верзија, бензинско-електричен хибрид и „Plug-In“ хибридна верзија.
Првите официјални цртежи покажуваат дека станува збор за седан со спортска линија, со стилски елементи карактеристични за новата генерација на автомобили на „Hyundai“, како што се издолжените фарови со интегрирани „LED“ дневни светла.
Кокпитот е обликуван едноставно и минималистички со централно поставен екран на мултимедијалниот систем.
„Hyundai“ соопшти дека при конструирањето воделе сметка за просторот во внатрешноста да биде што подобро и поефикасно искористен, во однос на надворешните габарити на возилото.
Автомобилот е поставен на новата механичка платформа, која овозможува вградување на сите три споменати погонски опции.
„Hyundai IONIQ“ премиера ќе има на домашниот, корејски пазар, во јануари 2016-та, а во Европа се очекува да пристигне на саемот во Женева.