Трофејниот кошаркарски стручњак Богдан Тањевиќ е новиот селектор на рeпрезентацијата на Црна Гора, потврди Кошаркарскиот сојуз на оваа земја. Тањевиќ на селекторската функција го наследи Лука Павиќевиќ, кој поднесе оставка во септември минатата година по дебаклот во европските квалификации.
Богдан Тањевиќ веќе ја предводеше селекцијата на Црна Гора, летово го освои златниот медал на Игрите на малите земји кои се одржаа на Исланд. Искусниот кошаркарски стручњак во кариерата бил селектор на Југославија, Италија и Турција. Со Италија беше европски првак (1999), со Турција светски вицепрвак (2010), а со Југославија вицепрвак на Европа (1981).
На клупски план има три титули во екс Југославија, две со Босна и една со Будуќност, со Босна беше и европски првак. Во Италија бил шампион со Олимпија Милано, во Франција со Асвел, а во Турција со Фенербахче.
