Фудбалскиот клуб Хофенхајм го именуваше Холанѓанецот Хуб Стевенс за нов тренер на првиот тим. Хофенхајм, во неделата, му врачи отказ на Маркус Гисдол поради очајните резултати, откако по десет рунди во Бундеслигата тимот се наоѓа на последното место со само шест освоени бодови.
Гисдол на клупата на Хофенхајм седна во април 2013-та година, а минатата сезона по голема борба успеа да избори опстанок во Бундеслигата.
„Ова не беше лесна одлука. Покажавме трпеливост за време на соработката со Маркус“, рекол спортскиот директор на Хофенхајм Александер Роси.
Хофенхајм во петокот загуби на домашен терен од Хамбург со 0:1 и остана на само една победа во сезоната.
Стевенс (61) во изминатите две сезони беше тренер на Штутгарт, а во кариерата работел во Шалке, Рода, Келн, Херта, ПСВ Ајндховен и Салцбург. Најголемиот успех го има постигнато во 1997-ма година кога со Шалке го освои Купот на УЕФА.
