Во Баерн Минхен повторно се појави скандал поврзан со главниот спонзор на клубот „Аdidas“. Германскиот концерн ја обезбедува опремата на тимот.
Во исто време, сепак, во неделата по дербито со Борусија Дортмунд петмина од играчите се фотографираа со копачките на „Nike“ и ја размножија фотографијата на социјалните мрежи.
Ова не им се допадна на луѓето од „Аdidas“ кои инсистирале за средба со раководството на клубот, за да разјаснат што се случило. Од Баерн потврдија пред „Sport1“ дека оствариле разговори со претставници на „Аdidas“, но официјално соопштение на оваа тема нема да има.
Во суштина секој фудбалер може да склучува индивидуален договор за копачките кои ги преферира.
Договорот со компанијата за спортска опрема е за уште цели 15 години, а за целиот рок клубот ќе добие 900 милиони евра.
Од „Аdidas“ сметаат дека Џером Боатенг, Џошуа Кимих, Артуро Видал, Тиаго Алкантара и Даглас Коста не дејствувале спонтано, а сето тоа било претходно организирано од „Nike“.
Претходно, Марио Гетце беше дел од скандал кога на прес-конференцијата за неговото претставување како фудбалер на Баерн, се појави со маичка со логото и натписот на американскиот концерн.