Навивачите на сите клубови од англиската Премиер лига овој викенд за време на првенствените натпревари ќе протестираат заради високите цени на влезниците, објавија во четврток британските медиуми.
Просечната цена на билетот за натпревар од Премиер лигата чини 53,76 фунти(72,78 евра), со што тие се најскапи во светот кога станува збор за националните фудбалски првенства. Во Шпанија просечната цена е 68,81 евра, во Италија 67,82 евра. Франција има далеку попристапна цена (36,37 евра), а најевтини се влезниците во Германија, само 31,16 евра.
Со акцијата “Twenty is Plenty” навивачите бараат цените на влезницата за натпреварите во гости да не биде поголема од 20 фунти(27 евра).
Најскапи влезници плаќаат напаѓачите на Арсенал, каде што цената на билетот на Емиратес стадионот може да достигне и 97 фунти(131 евро). Така за неделното дерби меѓу Арсенал и Манчестер Јунајтед гостинските навивачи ќе платат влезница по цена од 64 фунти(86 евра). Повеќе се плаќа само кога се гостува кај Вест Хем (70 фунти, односно 95 евра).
Од Премиер лигата одговараат дека 12 клубови нудат годишни влезници што им овозможува на навивачите да го следат својот клуб за само 26 фунти по меч.
Но првиот човек на Федерацијата на фудбалски навивачи Кевин Мајлс смета дека клубовите би можеле навивачите бесплатно да ги пуштат на стадионите со оглед на тоа колку ќе заработат од продажбата на ТВ правата. Имено, Премиер лигата за периодот од 2016 до 2019 година ќе добие седум милијарди евра.
„Цените на влезниците се голема пречка за навивачите да можат во живо да ги гледаат натпреварите на својот тим. А од продажбата на ТВ правата клубовите ќе заработат толку пари, што ќе можат да им дозволат на навивачите бесплатен влез на стадионите“, изјави Мајлс.
