Вардар славеше над ПИК Сегед со 27:23 (11:11) во второто коло во Б групата во Лигата на шампионите.
Македонскиот шампион имаше проблеми во нападот во првото полувреме, поради што тој дел заврши нерешено со 11:11. Во вториот дел Вардар ги намали техничките грешки во нападот, а одбраната на чело со Штербик потоа му го трасираше патот до победата.
Арпад Штербик со 15 интервенции и на овој меч беше предводникот на Вардар. Стрелците ги предводеше Карачиќ со пет голови, а по четири постигнаа Циндриќ, Душебаев и Дибиров.
Добро отворање на мечот имаше Вардар, по воведните 2:0, стигна и до три гола предност најпрвин 6:3, а потоа и 7:4 на истекот од 14.минута.
Потоа следуваше неверојатен пад на играта на Вардар, пред се во нападот, каде тешко се справуваше со зоната 5-1 на ПИК Сегед, се редеа технички грешки, Сеира на голот на противникот одбрани неколку зицери и Унгарците во 23.минута стигнаа до првото водство на мечот 7:8.
Во финишот на полувремето ПИК Сегед имаше и два гола предност (9:11), но во последните 120 секунди од полувремето Цинрдиќ постига два гола за 11:11 по 30 минути игра.
На првиот гол во вториот дел се три ипол минути кога погоди Дибров и му ја врати предноста Вардар, а потоа двете одбрани на Штербик, Карачиќ ги круниса со гол за 14:11, што беше сигнал за тренерот на унгарскиот тим Пастор да побара минута одмор.
Серијата Вардар ја продолжи и по тај аутот на Пастор и во 37 минута Абутовиќ погоди за предност од четири голови (16:12).
Предноста од четири голови донесе стабилност во играта на Вардар, чии играчи со леснотија ја одржуваа разликата во наредните десет минути, а во 48.минута Марсениќ донесе нова максимална предност (22:17).
‘Црвено-црните’ до крајот без проблем ја исконтролираа играта и ја забележаа втората победа сезонава во Б групата.
Во наредното коло, на 4.октомври, Вардар ќе гостува во Шведска кај Кристијанштад.
