Дисциплинската комисија при Фудбалскиот сојуз на Италија му изрече суспензија од три натпревари на поранешниот македонски репрезентативец Горан Пандев.
Пандев, кој од оваа сезона го носи дресот на Џенова, доби црвен картон во неделата на натпреварот со Лацио во Рим. Во финишот на мечот, Пандев во обид да се загради со лакт директно во лицето го удри противничкиот играч Маурисио.
Според Дисциплинската комисија стартот на Пандев бил со намера, па поради тоа тој добил максимална казна од три натпревари.
Пандев, кој на почетокот од сезоната е далеку од вистинската форма и сè уште нема постигнато гол за својот нов тим, ќе ги пропушти натпреварите кои Џенова ќе ги одигра против Милан, Удинезе и Киево.
