Менаџерот на Челзи Жозе Мурињо би можел да биде суспендиран на пет натпревари поради сексистичкото однесување кон докторот на „сините“ Ева Карнеиро, пренесе денеска агенцијата АФП.
За време на натпреварот со Свонси, на 8-ми август, кој заврши без победник 2:2, Мурињо грубо и се обрати на Карнеиро која од клупата влета на теренот за да му укаже помош на Еден Азар. Според Мурињо, докторката не требало да влезе на теренот бидејќи со тој гест не му помогнала на тимот.
Фудбалската асоцијација на Англија соопшти дека „примила барање за истрага во врска со инцидентот на мечот помеѓу Челзи и Свонси“, без да прецизира што ќе биде предмет на истрагата.
Веднаш по натпреварот Португалецот ја суспендираше Карнеиро која сè уште не започнала со своите секојдневни обврски.
Според правилата на Фудбалската асоцијација на Англија, играчите и тренерите можат да бидат казнети поради употреба на вулгарен речник и гестови.
