Кошаркарската репрезентација на Италија рутинирано обезбеди пласман во четвртфиналето на Европското првенство. Италијаните во осиминафиналето славеа над Израел со 82:52.
Италија во овој меч влезе како фаворит и таа улога ја оправда во целост. Израелците успеваа да се одржат на негатива од десет поени во првото полувреме, но во третата четвртина претрпеа вистински дебакл, постигнаа само девет поени, а примија 28 и тука патникот во четвртфиналето практично беше решен.
Италијанскиот селектор Симоне Пјаниџани, со оглед на движењето на резултатот, успеа да ги одмори своите главни ѕвезди па тимот до победата го предводеше Џентиле со 27 поени.
Кај Израелците единствен расположен за игра беше Мекел кој уфрли 20 кошеви.
Италија во четвртфиналето ќе игра против победникот од мечот помеѓу Литванија и Грузија.