Жозе Мурињо, менаџерот на фудбалерите на Челзи, благодарение на своите остварувања ќе се најде во новото издание на Гинисовата книга на рекорди за 2016-та година.
Легендарниот Португалец е сопственик на четири рекорди.
Првиот е поврзан со шампионската титула во Премиерлигата која Челзи ја освои во 2005-та година, тогаш „сините“ освоија рекордни 95 бодови. Во истата таа сезона одбраната на Челзи прими само 15 голови, што е најмалку во историјата на лигата.
Исто така, Мурињо имал серија од 77 натпревари на домашен терен на кои не забележал пораз. Португалскиот тренер е најмладиот во историјата кој стигнал до 100 победи во Лигата на шампионите, до ова остварување стигна на клупата на мадридски Реал.
„Убаво е што сите тие признанија ќе можам да ги имам во мојата канцеларија. Како дете ги читав тие книги, не можев да замислам дека еден ден и самиот ќе бидам дел од Гинисовата книга“, вели Мурињо.