Легендарниот кошаркар на Панатинаикос, Димитрис Дијамантидис, најави дека оваа сезона ќе биде последна во неговата кариера.
„Ја донесов одлуката, сакам да играм уште една сезона и да ја завршам кариерата. Целта ми е да останам здрав и да му помогнам на тимот да освојува трофеи. Доколку успеам во тоа, тогаш на најдобар можен начин ќе ставам крај на кариерата“, вели Дијамантидис.
Дијамантидис кариерата ја започна во Ираклис, а во 2004-та година се пресели во Панатинаикос.
„Тоа е животот. Ќе дојдат нови играчи. Јас ќе престанам да играм, но кошарката и Панатинаикос ќе продолжат да постојат. Ништо нема да се смени. Имав многу убави моменти во кариерата и да бидам искрен не го очекував тоа“, дополни 35-годишниот кошаркар.
Дијамантидис со Панатинаикос има освоено девет титули во грчкото првенство и исто толку пати го освојувал Купот на Грција, а во Евролигата освоил три трофеи (2007, 2009, 20011). Со репрезентацијата на Грција бил европски првак (2005) и светски вицепрвак (2006).
Шест пати бил прогласуван за најдобар дефанзивец во Евролигата, а во 2011-та година бил најкорисен играч во елитното натпреварување. Дијамантидис е најдобар асистент во историјата на Евролигата.