Концернот „BMW“ нема да го прескокне сеопштиот занес кон спортски автомобили со хибридни агрегати и ќе овозможат следните генерации на моделите „M3“ и „M4“ да имаат токму таква технологија.
Изданието „The Detroit Bureau“ тврди дека двете возила ќе ги задржат своите редовни 6-цилиндрични турбо мотори, но тие ќе бидат сериозно надградени и тоа ќе овозможи зголемување на максималниот вртежен момент за околу 100 Нм. Вклучувањето на електромотор во системот не само што ќе ја зголеми моќта на агрегатите, туку и ќе го промени погонот.
Сега тој е на задната оска, но кај следните генерации ќе биде 4х4, тврдат информациите. Моторот со внатрешно согорување ќе ги придвижува задните тркала, а електромоторите – предните. Освен тоа новите „M3“ и „M4“ ќе бидат опремени со систем за обновување на кинетичката енергија (KERS), како и со други технологии од Формула 1.
Токму ова решение довело до сериозни спорови кај раководството на „BMW“. Дел од врвните менаџери на концернот сметаат дека дополнителниот електромотор и батериите за него значително ќе ја зголемат тежината на автомобилите и ќе пречат во нивното возење, пишува „The Detroit Bureau“.
Приврзаниците на идејата за хибридизација на седанот и караванот тврдат дека до смената на генерациите на „M3“ и „M4“, Концернот ќе може да развие полесни батерии. Освен тоа зголемената тежина ќе биде компензирана со посериозно користење на карбон во каросеријата на двете возила.
