Еден од најдобрите неамерикански кошаркари во НБА лигата, Емануел Ману Џинобили, го продолжи договорот со Сан Антонио Спарс. Наредната сезона ќе биде 14-та за Аргентинецот во НБА лигата, во која во текот на кариерата има просечен учинок од 14,3 поени, четири асистенции и 3,8 скока на 865 одиграни натпревари.
Џинобили во 1999-та година беше избран во втората рунда на драфтот, а во меѓувреме стана најдобриот шутер за три поени во историјата на Сан Антонио и втор според бројот на украдени топки. Аргентинецот во 2008-ма година беше избран за најдобар шести играч во лигата.
Џинобили има најдобар процент на успешност од активните играчи во НБА лигата од 72,3 отсто (625 победи и 240 порази), а со Сан Антонио има освоено четири шампионски титули.
Заедно со Тони Паркер и Тим Данкан, Аргентинецот е дел од трио со најмногу одиграни заеднички мечеви во НБА лигата и со најмногу забележани победи во плеј офот.
Исто така Џинобили е еден од осуммината кошаркари во НБА кои во плеј офот имаат учинок од најмалку 2.500 поени, 750 скокови, 700 асистенции и 250 украдени топки. Ваков учинок имаат уште Коби Брајант, Скоти Пипен, Меџик Џонсон, Мајкл Џордан, Лери Бирд, Леброн Џејмс и Клајд Дрекслер.
Со аргентинската репрезентација го освои златниот медал на ОИ во 2004-та година во Атина, а покрај Бил Бредли е единствениот кошаркар кој покрај олимписко злато ја освои Евролигата и НБА лигата.