Фудбалерот на минхенски Баерн, Бастијан Швајнштајгер, по сé изгледа ќе остане во овој клуб, иако се шпекулираше дека тој ќе се пресели во Манчестер Јунајтед.
Швајнштајгер е еден од најтрофејните германски фудбалери, во кариерата освоил осум титули во Бундеслигата, седум во Купот на Германија, една во Лигата на шампионите, а има и титула светски првак со Германија. Минатата сезона, поради честите повреди, тој одигра само 15 натпревари за Баерн.
„Навистина би сакал повотрно да ја освојам Лигата на шампионите, но и да бидам успешен како што бев во минатите години. Три години сме шампиони на Германија, мислам дека ниту еден тим не освоил четири титули во низа, тоа е голем мотив“, изјавил Швајнштајгер за германските медиуми.
„Кога ќе освоите ‘големи’ титули какви што Лигата на шампионите и Светското првенство, луѓето мислат дека сте завршиле со кариерата, но јас имам поинаков поглед. Добро се чувствувам и подготвен сум на врвно ниво да играм уште три години. Тоа е мојата цел“, дополнил Швајнштајгер.