Кошаркарскиот сојуз на Хрватска им забрани на своите клубови да играат во лига која ФИБА не ја признава. ФИБА од 1.мај не ја признава АБА лигата бидејќи челниците на регионалното натпреварување не ги доставиле потребните документи околу сопственоста на лигата.
Одлуката на Хрватскиот кошаркарски сојуз значи дека Цибона, Цедевита и Задар ќе мора да ја повлечат поддршката која и ја дадоа на регионалната АБА лига.
Хрватскиот сојуз по седицата на Управниот одбор се огласи со соопштение.
„УО на ХКС во целост ги поддржува актите на ФИБА и нема да им дозволи на хрватските клубови да настапуваат во лига која ФИБА не ја признава. За донесената одлука ХКС писмено ќе ги извести ФИБА и клубовите. Истовремено, во понатамошните разговори со ФИБА и националните сојузи во регионот, ХКС ќе поддржи секој предлог кој ќе донесе добро за хрватската репрезентација и клубовите“, стои во соопштението на ХКС.
ФИБА на сите регионални сојузи им определи рок до 18.јуни да одговорат на писмото кое до нив е испратено на 29.мај.
