Една од најспектакуларните и највредните колекции на супер-спортски автомобили од различни епохи ќе биде понудена на продажба на аукција која ја организира „RM Sotheby’s“.
„Pinnacle Portfolio“ претставува вистинско доживување за богатите колекционери и љубители на возила кои ќе се наддаваат за 23 суперавтомобили.
Aукцијата ќе се одржи на 13-ти август во рамките на манифестацијата „Pebble Beach Concours d’Elegance“ во Калифорнија. Меѓу понудените модели дури 9 се ретки примероци на „Ferrari“ кои се произведени во шеесетите години од минатиот век, вклучувајќи го и „Ferrari Enzo“ кој папата Јован Павле Втори го доби како поклон од поранешниот шеф на „Ferrari“, Лука ди Монтеѕемоло.
Покрај него, тука се уште и „SWB Scaglietti California Spider“, „250 LM Scaglietti“, „275 GTB/4“, „288 GTO“, „Daytona Spyder“, „Ferrari 246 Dino“, како и двата легендарни топ модели од новата историја – „F50“ и „F40 LM“.
Вториот познат италијански производител на суперавтомобили, брендот „Lamborghini“, ќе биде претставен од класичната „Miura P400 SV“ и современиот и многу редок модел „Reventon“.
Боите на „Maserati“ ги брани „MC12“, a пак на „Jaguar“ моделот „XJ220“.
„Mercedes“ е присутен со две свои легенди од две различни епохи, моделите „300SL“ и „SLR McLaren“.
Кога сме веќе кај „McLaren“, тука е и славниот „F1 LM“.
„Porsche“ e присутен со познатите модели „356 A 1600 Speedster“ од педесетите години и „959“ од осумдесетите години од 20-тиот век.
Јапонските производители во оваа колекција ги застапува класичната „Toyota 2000 GT“, како и малите, но респектабилни авто-компании со моделите „Koenigsegg Agera CCXR“ и „Saleen S7 Twin Turbo“.
Понудата се заокружува со „Bugatti Veyron“ и „Veyron SuperSport“.
Доколку имате пари, коj од овие наведени автомобили Вие ќе го изберете?
