Тренерот на ПСЖ Лоран Блан ја отфрлил можноста десниот бек на Барселона, Дани Алвес да го засили неговиот тим, пренесува Marca. Договорот на Бразилецот со Барселона истекува на 30-ти јуни.
„Мислам дека Алвес ќе го продолжи договорот со Барселона“, смета Лоран Блан.
Бразилецот изминатиот период изјавуваше дека е незадоволен од статусот и платата во Барселона и дека сериозно размислува за заминување.
Алвес прецизирал дека плановите за својата иднина ќе ги открие по финалето во Лигата на шампионите кое ќе се одигра на 6-ти јуни во Берлин.
Бразилскиот бек во Барселона пристигна во 2008-ма година и на 342 натпревари постигнал 20 голови. Со Каталонците тој ги има освоено сите титули во клупскиот фудбал.
Пред Барселона, Алвес шест години беше дел од Севилја, а за бразилската репрезентација има одиграно 79 натпревари и постигнато шест голови.